Иран парламентинин төрагасы Марлен Маматалиевди куттуктады

Иран парламентинин төрагасы
Мохаммад-Багер Галибаф Жогорку Кеңештин төрагасы Марлен Маматалиевди кызматка шайланышы менен куттуктады. Бул тууралуу Жогорку Кеңештин басма сөз кызматынан билдиришти.

Маалыматка ылайык, жолдонгон телеграммада бул чечим Кыргызстандын эл өкүлдөрүнүн Марлен Маматалиевдин кесипкөйлүгүнө жана бай тажрыйбасына көрсөткөн ишениминин айкын далили экени белгиленген.

Ошондой эле Ирандын Ислам Кеңешинин Межлиси Жогорку Кеңеш менен кызматташтыкка өзгөчө маани берерин билдирип, парламенттер аралык алакаларды кеңейтүүгө кызыкдар экенин билдирген. Анын ичинде депутаттык достук топторунун диалогун жандандыруу жана расмий делегациялардын өз ара иш сапарларын уюштуруу маселелерине көңүл бурулары айтылган.

Мындан сырткары эл аралык аянтчалардагы кызматташтыкты өнүктүрүү жана эки тараптуу байланыштарды тереңдетүү мамлекеттер ортосундагы өнөктөштүктү бекемдөөгө өбөлгө түзөрүнө ишеним артылган.

Ошону менен катар Мохаммад-Багер Галибаф Марлен Маматалиевди жана жалпы кыргыз элин ыйык Орозо айынын башталышы менен да куттуктады.