Ошто 4600дөн ашуун окуучу билим алган мектеп жаңыланды

Ош шаарындагы А. Масалиев (Н. Нариманов) атындагы №7 жалпы билим берүү мекемеси капиталдык оңдоодон кийин салтанаттуу түрдө пайдаланууга берилди. Бул тууралуу шаардык мэриядан билдиришти.

Маалыматка ылайык, иш-чарага мэр Жанарбек Акаев, тиешелүү жетекчилер, мугалимдер жана коомчулук өкүлдөрү катышты.

Салтанаттын алкагында мектептин алдына мамлекеттик жана коомдук ишмер Абсамат Масалиевдин эстелиги орнотулду. Ошондой эле билим берүү мекемесинин фасады, терезелери жана эшиктери толугу менен жаңыланып, имарат заманбап талаптарга ылайык оңдолду.

2025–2026-окуу жылында мектепте 134 класс-комплект ачылып, учурда 4615 окуучу билим алууда. Кыска мөөнөттө жүргүзүлгөн оңдоо иштери материалдык-техникалык базаны чыңдап, окуучулар үчүн коопсуз, жылуу жана ыңгайлуу шарттарды түздү.

Оңдоп-түзөө иштери республикалык бюджеттин эсебинен каржыланды.