Куудул Нурлан Сабуров Орусияга кирүүгө тыюу салынгандан кийин алгачкы концертин берди

Белгилүү куудул Нурлан Сабуров Орусияга кирүүгө тыюу салынгандан кийин алгачкы концертин Таиландда өткөрдү. Иш-чара Пхукет аралында болуп өттү. Бул тууралуу чет элдик басылмалар жазышты.

Концерт учурунда Сабуров Орусияга кирүүгө салынган чектөө тууралуу ирониялык тамашаларды айтты. Анын сөзүнө караганда, айрым көрүүчүлөр концертке эмес, "кылмышкерди көргөнү" келгендей сезилген. Ошондой эле ал: "Менимче, мындай тыюу Владимир Зеленскийде деле жок болушу мүмкүн. 50 жыл! Мен эмне, Дракулабы?",- деп тамашалаган.

Мындан тышкары, комик эми анын стендап программалары "ушунчалык патриоттук болорун" кошумчалаган.

Учурда Нурлан Сабуров чет өлкөлөрдө гастролдук программасын улантууда. Анын Орусияга кирүүсүнө байланыштуу чектөө коомчулукта талкуу жаратып, социалдык тармактарда ар кандай пикирлер айтылууда.