Эми муздан жабыркаган орусиялык жарандарга компенсация төлөнөт 

Муздан улам жабыркаган Орусиянын жарандарына компенсация төлөнөт. Бул тууралуу Орусиянын РИА новости басылмасына Мамлекеттик Думанын депутаты Дмитрий Свищев билдирген.

Андагы маалымат боюнча, муздан жаракат алган жарандар сот аркылуу 300 миңден 350 миң рублга чейин акчалай каражат өндүрүшсө болот. Бул акча дарыланууга жана башка чыгымдарга жумшалат. Жарандар муздан кулап кеткен учурда, ал жерди өз убагында тазалабаган тиешелүү мекеме күнөөлүү деп эсептелинет. Бул маселеде мыйзам толугу менен жабырлануучу тарапта болот.

Бирок жаран компенсация алуу үчүн керектүү жумуштарды аткарууга тийиш: музду сүрөткө тартып, ал жердеги күбөлөрдү видеого түшүрүп жана дарыланууга кеткен чыгымдардын дүмүрчөгүн сактап.

Акыркы учурда жолдогу муздан жабыркаган жарандар дарылануу үчүн 350 миң рублдей каражат коротуп жатканы эсептелген. Мындан улам компенсация төлөө маселеси каралган.