Чүйдө жер участогун мыйзамсыз ээлеп алган шектүү кармалды

Чүй облусунда 4 гектар жер участогун мыйзамсыз ээлеп алган шектүү кармалды. Бул тууралуу 26-февралда облустун милициясынан билдиришти.

Маалыматка ылайык, 28-январда 1978-жылы туулган Д.А. аттуу Бишкек шаарынын тургуну милицияга арыз менен кайрылган. Анда Ж.Э. аттуу жаран анын 4,05 гектар аянттагы айыл чарба жер участогун мыйзамсыз ээлеп алып, жердин максаттуу колдонулушун бузган курулуш иштерин жүргүзгөн.

Бул факт боюнча Кылмыш-жаза кодексинин 212-беренеси (Бөтөн жер участогун өзүм билемдик менен ээлеп алуу жана максаттуу багытын бузуу менен айыл чарба багытындагы жерлерге өзүм билемдик менен курулуш куруу) боюнча кылмыш иши козголду.

Ыкчам-издөө иш-чараларынын жүрүшүндө 1966-жылы туулган Ж.Э. аттуу жаран аныкталды.

Учурда кылмыш иши боюнча тергөө уланып жатат.