Атактуу актёр тартылган Кыргызстан тууралуу тасманын бет ачары Лондондо болду

Кечээ, 25-февралда Улуу Британиянын Лондон шаарында "Beyond the Silk Road" аттуу Кыргызстан тууралуу даректүү тасманын расмий бет ачары болуп өттү. Бул тууралуу Маданият министрлиги кабарлады.

Маалымдалгандай, аталган тасма өлкөнүн керемет жаратылышын, бай тарыхын, кайталангыс маданиятын жана кылымдарды карыткан көчмөн салттарын чагылдырууга арналган. Тасманын тартуулары 2025-жылдын жай айларында Кыргызстан аймагында жүргүзүлгөн.

"Долбоордун башкы каарманы жана алып баруучусу белгилүү британиялык актёр, BAFTA сыйлыгынын ээси, "Алтын глобус" жана "Эмми" эл аралык сыйлыктарынын талапкери Доминик Уэст. Даректүү фильм Кыргызстандын аймагындагы Улуу Жибек жолунун багыттары боюнча жасаган сапарына арналып, дүйнөлүк көрүүчүлөр үчүн Борбор Азиянын жүрөгүнө өзгөчө маданий саякат тартуулайт. Тасма 2026-жылы кеңири эл аралык прокатка чыгары күтүлүүдө", - деп айтылат маалыматта.