Акыйкатчы өзүн өрттөгөн аялдын кош бойлуу кызынын ишин жеке көзөмөлүнө алды

Ысык-Көлдүн Ак-Суу айылында өз өмүрүн кыйган 40 жаштагы аял Ак-Суу райондук ички иштер бөлүмүнүн унаа токтотуучу жайында өзүнө-өзү өрт койгон. Бул тууралуу Акыйкатчы институту билдирди.

Маалыматка ылайык, акыйкатчы Жамиля Жаманбаева маркумдун кош бойлуу 16 жаштагы кызынын ишин жеке көзөмөлүнө алган. Ал укук коргоо органдарын бул ишти тыкыр иликтеп, калыс укуктук баа берүүгө чакырган.

Ошондой эле маалыматта маркумдун артында дагы 15 жана 6 жаштагы кыздары жана 14 жаштагы уулу калганы айталат. Аял жолдошу менен ажырашып кеткендиктен 3 кыз, 1 уулун жалгыз багып келген. Аз камсыз болгон үй-бүлө катары каттоодо тургандыктан маркум балдарына 2018-жылдан бери жөлөкпул алчу. Кайрымдуулук фонддорунун жардамы менен өткөн жылы жалгыз бой энеге үй салынып берилген.

"Учурда балдар таежесинин камкордугунда. Жакынкы убакта мамлекет расмий камкорчу маселесин чечет. Кош бойлуу өспүрүм кыз да учурда туугандары менен үйүндө",- деп кошумчалайт Акыйкатчы институту.

Эске салсак, Ысык-Көл облустук милициясы 25-февралда 40 жаштагы аял кызынын кош бойлуу экенин уккандан кийин өзүнө өрт койгонун билдирген.