"Саясий оюндарга жол берилбейт". Садыр Жапаров бийликтегилерге эскертүү жасады

Өлкө башчы Садыр Жапаров бийлик бутактарын, мамлекеттик кызматкерлерди саясий оюндардан алыс болууга чакырды.

Президент ар бир бийлик органынын, ар бир түзүмдүн жана ар бир жетекчинин бир эле максаты бар экенин, ал элге жана мамлекетке ак кызмат кылуу болуп саналарын белгиледи.

"Бийликтин эч бир бутагы саясий оюндар же кысым көрсөтүү, же өз көз карашын таңуулоо үчүн түзүлгөн эмес. Саясий оюндар менен алектенүүгө жол берилбейт, анткени ал баш аламандыкка, сенектикке, чыр-чатакка жана элдин ишенимин жоготууга алып келет. Мурда дал ушул саясий амбициялар мамлекеттик органдардын милдеттери менен аралашып кетип, өнүгүүнү кан буугандай токтотуп, институттарды бузуп, демилгелерди артка тартып, натыйжада элдин ишенимине доо кетирген.

Чечимдер эл үчүн эмес, чакан топтордун кызыкчылыктары үчүн кабыл алынган учурлар көп болгондуктан, өлкө ондогон жылдар бою ордунан жыла албай калган учурларды баштан кечирдик. Бүгүн биздин ката кетирүүгө да акыбыз жок. Ар бир жетекчи, ар бир кызматкер түздөн-түз өзүнө тагылган иш-милдеттери менен гана алектениши керек",- деди мамлекет башчы республикалык кеңешмеде.