Шеригин сатам деп өзү да колго түштү... Бишкекте баңгизат лабораториясы табылды

Бишкекте жашыруун баңгизат лабораториясы аныкталып, 4 килограммдан ашык баңгизат табылды. Бул тууралуу борбор калаанын милициясы билдирди.

Маалыматка ылайык, милицияга кармалган 20 жаштагы жигит өз ыктыяры менен 5,86 граммды түзгөн каннабис майын тапшырган. Бул факт боюнча Кылмыш-жаза кодексинин 282-беренеси (Сатуу максатында баңгизат каражаттарды, психотроптук заттарды жана алардын аналогдорун мыйзамсыз даярдоо) менен кылмыш иши козголгон.

Тергөөдө жигит аталган затты 31 жаштагы жарандан сатып алганын айткан. Деген менен экөө бирге батирде баңгизат даярдоо үчүн лаборатория ачып алган. Алардын жашаган жери тинтүүгө алынып, 3 килограмм 739 грамм болгон каннабис майы, 2,33 грамм наркотикалык зат аралашкан тамеки жана 293 грамм курамында каннабистин белгилери бар тамеки буюмдары табылган.

Шектүүлөр баңгизат каражаттарын Telegram канал аркылуу сатып келишкен. Алар убактылуу кармоочу жайга киргизилишти.