Жогорку Кеңеште “Жаштар диалогу - 2026” иш-чарасы өттү

Жогорку Кеңеште төрага Марлен Маматалиев баштаган парламент депутаттарынын жана жаштар өкүлдөрүнүн катышуусунда “Жаштар диалогу – 2026” аттуу баарлашуу аянтчасы уюштурулду. Иш-чарага мамлекеттик органдардын жана жаштар уюмдарынын өкүлдөрү да катышты.

Жогорку Кеңештин басма сөз кызматынан билдиришкендей, жыйынды ачкан төрага жаштар менен системалуу жана ачык диалог жүргүзүү чоң мааниге ээ экенин белгилеп, парламент жаштар саясатына өзгөчө көңүл бурарын айтты.

Жолугушуунун модератору, депутат Табылды Муратбеков Жогорку Кеңештин төрагасына караштуу Жаштар кеңеши түзүлгөнүн маалымдап, жаңы консультативдик орган жаштар саясаты боюнча сунуштарды талкуулоо жана туруктуу диалог жүргүзүү үчүн аянтча болорун белгиледи. Анын айтымында, кеңештин ишмердүүлүгү жаштарды мыйзам чыгаруу процессине активдүү тартууга өбөлгө түзөт.