Айпери Медет кызы Албаниядагы рейтингдик турнирдин чемпиону болду  

Айпери Медет кызы Албаниянын Тирана шаарында өтүп жаткан эл аралык рейтингдик турнирде алтын медаль утту. Бул тууралуу Дене тарбия жана спорт мамлекеттик агенттиги билдирди.

Маалымдалгандай, ал 28-февралда кыз-келиндер күрөшү боюнча 76 килограммга чейинки салмак ченинде килемге чыгып, 1/8 финалда Казакстандын өкүлү Гулмарал Еркебаеваны 12:2 эсебинде мөөнөтүнөн мурда жеңген. Чейрек финалда болгариялык Ванеса Георгиева 10:0 эсебинде утса, жарым финалда Түркиянын балбаны Элмира Ясинди 14:0 эсебинде мөөнөтүнөн мурда уткан.

Ал эми финалда Айпери дүйнөнүн учурдагы чемпиону, эквадорлук Генесис Реаско Валдезди 5:4 эсебинде жеңип, турнирдин жеңүүчүсү аталган.

Эске салсак, балбандар 2025-жылдагы дүйнө чемпиондугунун финалында да беттешип, анда жеңиш эквадорлук балбанга буюрган. Бул ирет Айпери Медет кызы реванш алып, финалдык кармашта жеңишке жетишип, рейтингдик турнирдин алтын медалын тагынды.