Тель-Авивдеги айрым райондордо жардыруулардын үндөрү угулганы маалымдалды

Израилдин борбору Тель-Авив шаарында жардыруулардын үндөрү угулганы менен аба чабуулу тууралуу коңгуроо берилген эмес. Жардыруулардын булагы азырынча белгисиз. Бул тууралуу бүгүн, 2-мартта Reuters агенттиги маалымдады.

Маалыматта айтылгандай, жардыруулар шаардын айрым бөлүктөрүндө угулган, бирок аба кооптуулугу тууралуу расмий эскертүү жарыяланган эмес.

Эскерте кетсек, 28-февралда АКШ менен Израил Иран аймагында кеңири масштабдагы аскердик операция баштаган. Буга жооп катары Иран да операциясын баштап, Жакынкы Чыгыштагы америкалык аскердик базаларга жана Израилдин шаарларына сокку урган. Иран тараптан жасалган чабуулдардын кесепетинен Бириккен Араб Эмирликтери, Бахрейн, Ирак, Оман жана Перс булуңундагы өлкөлөр жабыркаганы кабарланды.

1-мартта Израилдин соккуларынын натыйжасында Ирандын жогорку лидери аятолла Али Хаменеи каза болгону маалымдалды. Өлкөдө улуттук аза күтүү жарыяланып, убактылуу жетекчилик кеңеши түзүлдү. Ирандын президенти Масуд Пезешкиан Хаменейдин өлүмү үчүн өч алууну убада кылды.