АКШ менен Израилдин Иранга кол салуусунан 170ке жакын студент жана мугалим каза болду 

Иран бийлиги АКШ менен Израилдин чабуулдарынан каза тапкан студент жана мугалимдердин санын ачыктады. Бул тууралуу бүгүн, 2-мартта Орусиянын РИА новости басылмасы жазды.

Андагы маалыматка ылайык, АКШ менен Израилдин кол салууларынан каза тапкан студент жана мугалимдердин саны 170ке жеткен.

Буга чейин Иран бийлиги АКШ менен Израил Хормозган провинциясынын Минаб шаарындагы кыздар мектебине кол салганын билдирген. Анда кол салуудан каза болгондордун саны 160тан ашканы айтылган болчу.

Эскерте кетсек, 28-февралда АКШ менен Израил Иран аймагында кеңири масштабдагы аскердик операция баштаган. Буга жооп катары Иран да операциясын баштап, Жакынкы Чыгыштагы америкалык аскердик базаларга жана Израилдин шаарларына сокку урган. Иран тараптан жасалган чабуулдардын кесепетинен Бириккен Араб Эмирликтери, Бахрейн, Ирак, Оман жана Перс булуңундагы өлкөлөр жабыркаганы кабарланды.