Ирандык дрондор Абу-Дабидеги француз аскер базасына сокку урду

Ирандык Shahed-136 үлгүсүндөгү эки учкучсуз учак Camp de la Paix аттуу француз аскер-деңиз базасына чабуул жасады. Аталган база Абу-Даби шаарындагы Порт-Зайед аймагында жайгашкан. Бул тууралуу бир катар чет элдик маалымат каражаттары жазып чыгышты.

Чабуулдун чоо-жайы

OSINT-аналитик жүргүзгөн геолокациялык талдоого ылайык, видеолордогу кадрлар аскердик объектке жакын координаттарды көрсөтөт.

Бириккен Араб Эмираттарынын Коргоо министрлиги билдиргендей, сокку “Аль-Салам” деп аталган объектке тийген. Эмират бийлиги расмий билдирүүлөрүндө дал ушул аталыш менен базаны атап келет.

Маалыматка ылайык:

• Кампадагы эки контейнер жабыркаган;
• Өрт чыккан;
• Аскер кызматкерлеринин арасында каза болгондор жок.

Күбөлөр база аймагында коюу кара түтүн көтөрүлгөнүн айтышкан. Чабуулдун кесепеттерин көрсөткөн видеолор социалдык тармактарда тараган, бирок айрым жарыялар кийинчерээк өчүрүлгөнү кабарланды.

Базанын тарыхы жана мааниси

Camp de la Paix базасы 2009-жылдын май айында Франциянын ошол кездеги президенти Николя Саркози учурунда ачылган. Бул акыркы ондогон жылдардагы Франциянын Африкадан тышкаркы, алгачкы чет өлкөлүк аскер базасы.

Базада болжол менен 250 француз аскер кызматкери, анын ичинде аскер-деңиз күчтөрүнүн бөлүктөрү жайгашкан. Объект Франциянын флотунун Перс булуңунда, Оман булуңунда жана Инд океанынын түндүк бөлүгүндө туруктуу катышуусун камсыз кылат.

Аймактагы чыңалуу күч алууда

Бул чабуул АКШ жана Израилдин Иран аймагына жасаган соккуларына жооп катары жүргүзүлгөн ирандык ракеталык жана дрондук масштабдуу чабуулдардын фонунда болду.

Буга чейин Бахрейн, Кувейт, Бириккен Араб Эмираттары аймактарындагы объекттерге да соккулар жасалганы кабарланган.

Аймактагы аскердик-саясий абал курч бойдон калууда.