Трамп Иранга кол салуудан кийин бүгүн биринчи жолу эл алдына чыгат 

Бүгүн АКШ президенти Дональд Трамп Иранга кол салуудан кийин биринчи жолу эл алдына чыгып, Ак үйдөгү иш-чарага катышат. Бул тууралуу Трамптын администрациясы тараткан графикке таянуу менен чет элдик басылмалар жазышты.

Андагы маалыматтарга ылайык, жергиликтүү убакыт менен саат 11:00дө Трамп "Даңк" медалын тапшыруу аземине катышат. Ал эми бул күнгө пландаштырылган башка бардык иш-чаралар жабык эшик артында өтөт. Аларга басма сөз өкүлдөрү киргизилбей турганы айтылды.

Маалым болгондой, АКШнын лидери соңку кырдаал учурундагы дем алыш күндөрүн Флоридада өткөргөн. Трамп жекшемби күнү теледен чыккан эмес, бирок Иран тууралуу кайрылууларын Truth Social аркылуу билдирип турган.

Эскерте кетсек, 28-февралда АКШ менен Израил Иран аймагында кеңири масштабдагы аскердик операция баштаган. Буга жооп катары Иран да операциясын баштап, Жакынкы Чыгыштагы америкалык аскердик базаларга жана Израилдин шаарларына сокку урган. Иран тараптан жасалган чабуулдардын кесепетинен Бириккен Араб Эмирликтери, Бахрейн, Ирак, Оман жана Перс булуңундагы өлкөлөр жабыркаганы кабарланды.