Окуучулар арасында зомбулук Чүйдө жана Ошто көп катталары айтылды

Агартуу министринин орун басары Надира Жусупбекова мектеп окуучулары арасында зомбулук фактылары көп катталган аймактардын тизмесин атады. Бул тууралуу ал Жогорку Кеңештин тармактык комитетинин 2-марттагы жыйынында билдирди.

Айтымында, мектептердеги зомбулук жана балдарды коргоо боюнча атайын изилдөө жүргүзүлгөн.

"Өлкөнүн жети облусунда жана Бишкек Ош шаарларында билим берүү уюмдарындагы зомбулук жана балдарды коргоо боюнча улуттук изилдөө жүргүзүлдү. Анын жыйынтыгында окуучулардын арасындагы зомбулук калктын жыш жайгашкан аймактарында көп болгондугу аныкталды. Мисалы, булар Бишкек, Ош шаарлары, Чүй, Ош жана Баткен облустары",- деди орун басар.

Жусупбекова жыйында зомбулуктун эң көп таралган түрлөрү боюнча дагы кеп козгоду. Айтымында, аларга психологиялык, физикалык зомбулук жана кибер булинг кирет.