Кыргыз балбандары Албаниядагы мелдешти 9 медаль менен жыйынтыкташты

Албаниянын Тирана шаарында спорттук күрөш боюнча "MUHAMET MALO-2026" экинчи рейтингдик турнири жыйынтыкталып, Кыргызстандын спортчулары 9 медаль менен кайтышты.

Дене тарбия жана спорт агенттиги билдиргендей, аталган мелдешке Кыргызстандын атынан жалпы 28 балбан катышып, эркин күрөш, грек-рим күрөшү жана кыз-келиндер күрөшү боюнча күч сынашты. Мелдештин жыйынтыгында балбандар жалпы 9 медаль жеңип алышты.

Эркин күрөш боюнча:

• Эрназар Акматалиев (70 килограммга чейин) - алтын медаль;
• Орозобек Токтомамбетов (74 килограммга чейин) - күмүш медаль;
• Залкарбек Табалдиев (70 килограммга чейин) - коло медаль.

Кыз-келиндер күрөшү боюнча Кыргызстандын атынан катышкан төрт спортчунун бардыгы медаль тагынышты:

• Айпери Медет кызы (76 килограммга чейин) - алтын медаль;
• Нурзат Нуртаева (72 килограммга чейин) - күмүш медаль;
• Мээрим Жуманазарова (68 килограммга чейин) - күмүш медаль;
• Гүлнур Таштанбекова (65 килограммга чейин) - коло медаль.

Грек-рим күрөшү боюнча:

• Раззак Бейшекеев (72 килограммга чейин) - коло медаль;
• Үзүр Жусупбеков (97 килограммга чейин) - коло медаль.