Банктын кара тизмесине киргендердин маалыматы эми 2 жылдан кийин өчүрүлөт

Бүгүн, 2-мартта Жогорку Кеңештин Финансы, бюджет, ишкердик жана атаандаштыкты өнүктүрүү боюнча комитетинин жыйынында "Насыялык маалымат алмашуу жөнүндө" мыйзамга өзгөртүүлөрдү киргизүү тууралуу" мыйзам долбоору каралды.

Мыйзам долбоорун экономика жана коммерция министринин орун басары Беназир Нурланова тааныштырды.

Анда карыз алуучулардын насыялык маалыматтарын сактоо мөөнөттөрүн кыскартуу каралууда. Бул карыз алуучулардын насыяларга жетүүсүн жеңилдетүүгө, банк тутумуна болгон жүктөмдү азайтууга жана чакан жана орто бизнестин өнүгүшүн стимулдаштырууга мүмкүндүк берет.

"Депутаттардан түшкөн сунуштарды эске алуу менен негативдүү насыялык маалыматты эсепке алуунун жалпы мөөнөтүн 5 жылдан 2 жылга, ал эми позитивдүү насыялык маалымат үчүн 7 жылдан 5 жылга кыскартуу сунушталууда",- деди орун басар.

Тармактык комитет аталган мыйзам долбоорун экинчи окууда колдоду.