Өкмөт Европа биримдиги менен соттошуу ниети жоктугун билдирди

Министрлер кабинети Кыргызстандын Европа биримдигине каршы эч кандай соттук териштирүүнү баштоо ниети жок экенин жана эч кандай демилге көтөрбөй турганын билдирди.

Бул жакында Financial Times басылмасына министрлер кабинетинин төрагасынын биринчи орун басары Данияр Амангелдиевдин берген маегине түшүндүрмө болду. Өкмөт аталган маекте мүмкүн болуучу санкцияларга байланыштуу гипотетикалык сценарий талкууланганын тактады.

"Өлкө улуттук мыйзамдарга, өзүнүн эл аралык милдеттенмелерине жана эл аралык укукка толук ылайык аракеттенет. Экспорттук көзөмөл жана санкциялык режимдерди сактоо маселелери эл аралык өнөктөштөр менен макулдашуу жана диалог аркылуу гана чечилет.

Евробиримдиктин өкүлдөрү менен болгон байланыштарыбызда талкуулар процедуралык ачык-айкындуулукка, маалымат алмашууга жана жөнгө салуу механизмдерин андан ары чыңдоого багытталган. Соттук же тирешүү чаралары биздин мамилебизге кирбейт. Кыргыз Республикасы Европа биримдиги менен конструктивдүү өнөктөштүккө жана келип чыккан бардык маселелерди белгиленген укуктук жана дипломатиялык механизмдердин алкагында чечүүгө умтулат",- деп айтылат маалыматта.

Буга чейин аталган басылмага маек берген Амангелдиев Европа биримдиги Кыргызстанды Орусияга санкцияны кыйгап өтүүгө жардам берген деген кине менен кара тизмеге киргизсе, Бишкек сотко даттана турганын айткан.