Дубайдан учкан учак Москванын "Внуково" аэропортуна конду

Жакынкы Чыгыштагы соңку окуялардан улам токтотулган аба каттамдары жанданып, Дубайдагы алгачкы каттамдын учагы Москванын "Внуково" аэропортуна конду. Бул тууралуу чет элдик басылмалар жазышты.

Маалыматка ылайык, учактын ичиндеги жүргүнчүлөрдүн басымдуу бөлүгү 28-февралдан бери каттам күтүп жаткан Орусиянын жарандары болушкан.

"Дубайдан келген FZ 8489 каттамынын учагы 3-мартта саат 03:44тө конду",- деп жазылган аталган аэропорттун маалымат тактасында.

Эскерте кетсек, 28-февралда АКШ менен Израил Иран аймагында кеңири масштабдагы аскердик операция баштаган. Буга жооп катары Иран да операциясын баштап, Жакынкы Чыгыштагы америкалык аскердик базаларга жана Израилдин шаарларына сокку урган. Иран тараптан жасалган чабуулдардын кесепетинен Бириккен Араб Эмирликтери, Бахрейн, Ирак, Оман жана Перс булуңундагы өлкөлөр жабыркаганы кабарланды.

1-мартта Израилдин соккуларынын натыйжасында Ирандын жогорку лидери Али Хаменеи каза болду. Өлкөдө улуттук аза күтүү жарыяланып, убактылуу жетекчилик кеңеши түзүлдү. Ирандын президенти Масуд Пезешкиан Хаменейдин өлүмү үчүн өч алууну убада кылды. Учурда Жакынкы Чыгышта кырдаал курч бойдон калууда.