Руандалык Moriox Kids тобунун жаш таланттары Кыргызстанга келүүнү каалашууда (видео)

Руандалык Moriox Kids тобунун жаш таланттары Кыргызстанга келүүнү каалашарын айтышты. Мындай видео аталган топтун социалдык тармактагы баракчасына жарыяланган.

"Сиздердин колдооңуздарга терең ыраазычылык. Сиздердин керемет өлкөгө ашык болдук. Жакынкы күндөрү Гүлназ айым менен бирге Кыргызстанга барууну пландап жатабыз",- деп билдирген аталган бий тобунун негиздөөчүсү.

Белгилей кетсек, аталган африкалык бийчи балдар Гүлназ Чыныбек кызынын аткаруусундагы "Аттиң ай", "Ak Orgo City" командасынын "Дык-Кын-Дыш", кара жорго жана башка бир нече кыргыз музыкаларына бийлеп видео тартышкан.

Moriox Kids - Руанданын баш калаасы Кигалиден чыккан бийчилер тобу. Топ ар кандай бийлерди аткарып, социалдык тармактарга видео жарыялап, дүйнө жүзү боюнча аудиториянын көңүлүн өзүнө буруп келет.