Бишкекте мас болуп күбөлүгүнөн ажыраган айдоочу кайра кармалды

Бишкекте мас абалында унаа башкарууга шектелген жаран кармалганын милициянын Кайгуул кызматы кабарлады.

Маалыматка ылайык, 3-март күнү болжол менен саат 00:30 чамасында Kia Carnival үлгүсүндөгү унаа токтотулган. Текшерүү учурунда унааны башкарып бараткан айдоочудан алкоголдук ичимдик ичкендигинин белгилери байкалган. Кызматкерлердин документтерди көрсөтүү боюнча мыйзамдуу талабын аткаруудан айдоочу баш тарткан.

Айдоочу наркологиялык текшерүүдөн өткөрүлүп, жыйынтыгында спирттик ичимдик ичкендиги тастыкталды. Ошондой эле бул жаран буга чейин да мас абалында унаа башкарганы үчүн жоопкерчиликке тартылып, айдоочулук күбөлүгүнөн ажыратылганы аныкталды.

Аталган айдоочуга карата укук бузуу жөнүндө протокол түзүлүп, унаа айып короого токтотулду. Тиешелүү материалдар мыйзам чегинде чара көрүү үчүн сотко жөнөтүлөт.