Израил Ливандын түштүгүндө "Хезболлага" каршы чабуул жасады

Израил армиясы Ирандагы аскердик операциялар менен бирге Ливандын түштүгүнө чабуул жасады. Бул тууралуу Израилдин Коргоо күчтөрү билдирди.

"Израилдин аскерлери чек арага жакын бир нече позицияга жайгаштырылган. Бул алдыңкы коргонуу концепциясын күчөтүү максатында жана түндүк Израилдин тургундарын коргоо максатында жасалууда",- деп айтылат билдирүүдө. Соккулар "Хезболланын" террордук инфраструктурасына" багытталган.

Ливандын Саламаттык сактоо министрлигинин билдирүүсүнө ылайык, израилдик соккулардан бир күндүн ичинде 52 адам каза болуп, дагы 154 киши жаракат алган. Атайын соккулар Джнах кварталына жана Бурдж-эль-Бараджна конушуна тийген. "Хезболла" жооп катары Израилдеги бир нече аскердик базага сокку урган, бирок Израил тарап бул маалыматты тастыктаган жок.

28-февралда АКШ жана Израил Иранга ракеталык соккуларды жасаган. Жооп катары Иран Жакынкы Чыгыштагы америкалык аскердик базаларды аткылаган. Бахрейн, Катар, Кувейт, БАЭ, Оман жана Сауд Арабиясы Иран тараптан жасала турган соккуларга жооп берүүгө даяр экенин билдирген.