Иранда АКШ менен Израилдин соккусунан набыт болгондордун саны айтылды 

Иранда АКШ менен Израилдин кол салуусунан каза болгондордун саны 800гө жакындады. Бул тууралуу Ирандын Кызыл Жарым Ай коому билдиргенин чет элдик басылмалар жазышты.

"АКШ менен Израилдин Ирандын аймагына жасаган чабуулунан каза болгондордун саны 787ге жетти",- деп айтылган маалыматта.

Буга чейин кол салуудан 555 адам каза болгону кабарланган.

Эскерте кетсек, 28-февралда АКШ менен Израил Иран аймагында кеңири масштабдагы аскердик операция баштаган. Буга жооп катары Иран да операциясын баштап, Жакынкы Чыгыштагы америкалык аскердик базаларга жана Израилдин шаарларына сокку урган. Иран тараптан жасалган чабуулдардын кесепетинен Бириккен Араб Эмирликтери, Бахрейн, Ирак, Оман жана Перс булуңундагы өлкөлөр жабыркаганы кабарланды.

1-мартта Израилдин соккуларынын натыйжасында Ирандын жогорку лидери Али Хаменеи каза болду. Өлкөдө улуттук аза күтүү жарыяланып, убактылуу жетекчилик кеңеши түзүлдү. Ирандын президенти Масуд Пезешкиан Хаменейдин өлүмү үчүн өч алууну убада кылды. Учурда Жакынкы Чыгышта кырдаал курч бойдон калууда.