Депутат көрүстөндүн жанындагы көп кабаттуу үйлөр боюнча тынчсыздануусун билдирди (видео)

Бишкек шаардык кеңешинин депутаты Жаныбек Асанбеков Орто-Сай айылындагы көрүстөндүн жанында курулуп жаткан 9 блоктон турган турак жай комплекси боюнча тынчсыздануусун билдирди.

Анын айтымында, учурда маркумдар коюлуп жаткан көрүстөндүн жанындагы курулуш иштери санитардык нормаларды бузууда. Эл өкүлү ар кандай жугуштуу оорулар жаандан улам агып түшкөн суулар аркылуу тарашы мүмкүндүгүн белгилеп, курулуштар мүрзөлөрдөн кеминде 100 метр алыстыкта жайгашышы керектигин кошумчалады.

Ал шаардык мэриядан, Курулуш министрлигинен жана ыйгарым укуктуу органдардан буга укуктук баа берүү, мыйзам бузууга жол берген кызмат адамдарына чара көрүү жана уруксат документтеринин мыйзамдуулугун текшерүүнү талап кылды.

Эскерте кетсек, аталган айыл аймактык реформанын алкагында жакында Аламүдүн районунан Бишкек шаарына өткөн.