Израил Хаменеинин мураскери да бутага алынарын билдирди

Израилдин аскерлери маркум Али Хаменеинин ордуна келген ар бир жаңы Ирандын жогорку лидерин бута катары карашат. Бул тууралуу Израилдин коргоо министри Исраэль Кац билдирди.

Ал: "Ирандын террористтик режими тарабынан Израилди жок кылуу пландарын улантуу үчүн дайындалган ар бир лидер шексиз жок кылуунун бутасына айланат. Анын аты ким экени же кайда жашынганы маанилүү эмес",- дегенин жазат The Times of Israel гезити.

Ал ошондой эле Израил менен АКШ Иран элине өлкө өкмөтүн кулатууга мүмкүндүк берүүчү чараларды ишке ашырууну уланта берерин убада кылган.

Ирандын жогорку лидери Али Хаменеи 28-февралда АКШ менен Израилдин аба соккуларынан каза болгон. Маркум менен коштошуу аземи 4-март күнү башталып, үч күнгө созулат. Анын ордуна уулу Можтаба Хаменеи дайындалганы айтылды.