Кыргызстан протездөөнүн 3D-технологияларын киргизүүдө

Кечээ, 5-мартта Республикалык протездик-ортопедиялык буюмдар мекемесинде француз өндүрүшүндөгү 3D-сканер жана 3D-принтердин бет ачары болуп өттү. Бул тууралуу Эмгек министрлиги билдирди.

Маалым болгондой, баасы 45 850 евро болгон техника республикалык бюджеттин эсебинен сатылып алынды. Протездөөдө 3D-технологияларды киргизүү КМШ өлкөлөрүнүн арасында биринчи жолу ишке ашырылууда.

"Мекеме 13 миңден ашык майыптыгы бар жаранды тейлейт. Алардын ичинен 1396сы төмөнкү бут протездери, 443ү жогорку кол протездери менен камсыздалат. Жалпысынан протездик-ортопедиялык буюмдардын 150дөн ашык түрү жекече даярдалат",- деп белгиленди маалыматта.

Иш-чарага министрлер кабинетинин төрагасынын орун басары Эдил Байсалов, эмгек, социалдык камсыздоо жана миграция министри Канат Сагынбаев, Франциянын Кыргызстандагы элчиси, кесиптик бирликтердин өкүлдөрү, Раззаков атындагы Кыргыз мамлекеттик техникалык университетинин жана жабдууларды өндүрүүчү компаниянын өкүлдөрү, ошондой эле Орусия жана Өзбекстандан чакырылган өнөктөштөр катышты.