Жалал-Абаддагы жаңы аэропорттун курулушу токтодубу? Жооп

Социалдык тармактарда Жалал-Абад облусунда курулуп жаткан жаңы эл аралык аэропорттун курулушу токтоп калды деген маалыматтар чындыкка дал келбейт. Бул тууралуу бүгүн, 6-мартта президенттин облустагы өкүлчүлүгү билдирди.

Маалым болгондой, Багыш айыл аймагында 381 гектар жер аянтына курулуп жаткан жаңы эл аралык аэропорттун курулуш иштери уланууда.

"Учурда курулуш жүрүп жаткан тилкеде жогорку чыңалуудагы электр чубалгылары жайгашкандыктан жана аба ырайынын шарттарына байланыштуу айрым техникалык иштер жүргүзүлүп жатат. Ушуга байланыштуу убактылуу техникалык токтоо болгон. Ошол эле учурда курулуш иштерин жүргүзүп жаткан компания өз ишин улантууда",- деп белгиленди маалыматта.

Эскерте кетсек, долбоордун буюртмачысы "Кыргызстан аэропорттору" ишканасы. Башкы подрядчы президенттин Иш башкармалыгына караштуу "Кыргызстройсервис" мамлекеттик ишканасы. Аэродром бөлүгүн "Кыргыздортранспроект" мамлекеттик ишканасы, ал эми аэровокзалдын долбоорун Курулуш министрлигине караштуу Шаар куруу жана архитектура департаменти ишке ашырууда.