Бириккен Араб Эмираттарынын президенти өз өлкөсүн согуш абалында деп жарыялады

Ирандын соккуларына туш болгондор согуш абалында. Бул тууралуу Бириккен Араб Эмираттарынын президенти Мохаммед бин Заид Аль Нахайян билдирди.

"БАЭ согуш мезгилинен өтүп жатат", - деп келтиришти анын сөзүн чет элдик басылмалар.

Ошол эле учурда БАЭнин лидери "биз акыры күчтүү болуп чыгабыз" деп ишендирип, өлкөсү оңой олжого айланбай турганын белгилеген.

"Биз өлкөбүзгө, элибизге жана бул жерде жашаган чет элдиктерге болгон милдеттенмелерибизди аткарабыз – алар дагы биздин үй-бүлөбүздүн бир бөлүгү", - деген ал.

Жакынкы Чыгыш маалымат каражаттары ал бул билдирүүнү жума күнү жасаганын жазышты. Бирок билдирүү кийинчерээк гана белгилүү болду.

Акыркы күндөрү Иран АКШнын аскерлери жайгашкан Жакынкы Чыгыш өлкөлөрүнө активдүү сокку урган. Айрыкча БАЭ мындай соккулардан жабыркап келет. Тегеран эми соккулар токтотулганын жарыялады.