Депутат ышты азайтуу үчүн заманбап ЖЭБ курууну сунуш кылды

Жогорку Кеңештин депутаты Махабат Мавлянова ыш маселесин чечүү үчүн Кыргызстанда заманбап, түтүнсүз ЖЭБдерди куруу керектигин айтты. Бул тууралуу ал парламенттин Агрардык саясат, суу ресурстары, жер пайдалануу, экология жана жаратылышты коргоо боюнча комитетинин бүгүн, 9-марттагы жыйынында билдирди.

Мавлянова белгилегендей, ыш көйгөйү өлкө үчүн эң актуалдуу маселелердин бири болуп эсептелет. Ал учурда колдонулуп жаткан түтүнсүз мештер улуттук деңгээлде маселени чечпей жатканын белгилеп, көйгөйдү чечүү үчүн заманбап ЖЭБдерди куруу зарыл экенин айтты. Мавлянова мындай ЖЭБдерде жакшы чыпкалар орнотулуп, көмүрдү колдонууда абаны булгануудан коргоо мүмкүнчүлүгү болушу керектигин кошумчалады.

Депутат инвесторлорду тартуу үчүн аларга жакшы шарт түзүү маанилүү экенин, мисалы, ЖЭБ курууга жерди акысыз берүү мүмкүнчүлүгүн сунуш кылды.

Мавлянова ошондой эле Кыргызстан жыл сайын өлкөнүн керектөөлөрү үчүн чоң көлөмдө көмүр казып алат деп белгиледи. Анын айтымында, казылган көмүрдүн бир бөлүгү экспортко кетет, ал эми ички керектөө үчүн 2,5 миллион тонна пайдаланылат. Жалпы жылдык казылма көлөм 4 миллион тоннага жетет. Депутат көмүрдү туура саясат менен казып, келечекте балдарыбызга да калтыруу керектигин баса белгиледи.