Кыргызстанда порнографиялык сайттарды аныктоо жана бөгөттөө тартиби киргизилди

Кыргызстанда порнографиялык мүнөздөгү материалдарды камтыган сайттарды токтотуу же чектөө тартиби бекитилди. Тиешелүү №154 токтомго 6-мартта министрлер кабинетинин төрагасы Адылбек Касымалиев кол койду.

Жаңы тартипке ылайык, өлкөдө мындай материалдарды тараткан сайттар аныкталып, бөгөттөлөт. Ошондой эле Маданият, маалымат жана жаштар саясаты министрлиги бөгөттөлгөн сайттардын атайын тизмесин жүргүзөт жана мыйзамды бузган интернет-ресурстардын ишин токтотуу же чектөө боюнча чечим чыгарат.

Токтом расмий жарыялангандан 10 күндөн кийин күчүнө кирет.

Эскерте кетсек, өткөн жылы июлда Жогорку Кеңеш тарабынан “Интернет мейкиндигинде порнографиялык мүнөздөгү элементтери бар контентти камтыган сайттарга кирүүгө тыюу салуу жөнүндө” мыйзам кабыл алынып, өлкө башчысы кол койгон.