UNICEF: Ливандагы жаңжал дээрлик 700 миң адамды үйүн таштоого мажбур кылды

2-марттан тартып Ливан менен Израил ортосундагы жаңжалдын күчөшү 700 миңдей адамды, анын ичинде 200 миңдей баланы, үйүн таштоого мажбур кылды. Бул тууралуу Бүткүл дүйнөлүк балдар фонду (UNICEF) жазып чыкты.

Маалыматка караганда, массалык көчүү мурдагы жаңжалдагы жүздөгөн миңдеген адамдарга кошулду. Бейруттагы негизги футбол стадионунда 8 миңден ашык адамга ылайыкташкан убактылуу жай ачылган.

Ливандын социалдык иштер министри Ханин ас-Сейид билдиргендей, жаңжалдын биринчи беш күнүндө 450 миңден ашык ливандык үйүн таштоого аргасыз болду. Убактылуу жайлар, анын ичинде мектептер, Бейрут жана башка ири шаарларда толуп калган.

Белгилесек, 2-март түнү Ливан аймагынан Израилге бир нече ракета атылган, жоопкерчиликти "Хезболла" кыймылы өзүнө алган. Израил армиясы массалык соккуларды баштап, ондогон жайлар талкаланып, жүздөгөн адамдар каза болуп, жарадар болгон. Бул жагдай жүздөгөн миңдеген адамдарды коопсуз жерлерге көчүүгө мажбур кылды.