Бишкекте ири көлөмдө психотроптук заттарды саткан кылмыштуу топ кармалды (видео)

Бишкек шаарында ири көлөмдө психотроптук заттарды жана күчтүү таасир этүүчү дары-дармектерди саткан кылмыштуу топ кармалды. Бул тууралуу 10-мартта ИИМдин Баңгизаттарды мыйзамсыз жүгүртүүгө каршы күрөшүү кызматы билдирди.

Маалыматка ылайык, милиция кызматкерлери түнкү клубдардын жана көңүл ачуучу жайлардын айланасында тинтүү жүргүзүшкөн. Натыйжада көзөмөлдөнүүгө тийиш болгон заттарды сатып жүргөн 1998-жылы туулган В.А.С, 1999-жылы туулган З.Ю.Г жана 1975-жылы туулган Б.К.К. аттуу кылмыштуу топтун мүчөлөрү кармалышты. Алардан ири өлчөмдө психотроптук заттар жана күчтүү таасир этүүчү дары-дармектер табылган.

Аталган факт боюнча Кылмыш-жаза кодексинин 282-беренеси (Баңгизат каражаттарын, психотроптук заттарды жана алардын аналогдорун сатып өткөрүү максатында мыйзамсыз даярдоо) менен кылмыш иши козголду.

Алынган психотроптук заттар боюнча соттук-химиялык экспертизалар дайындалды. Учурда тергөө иш-чаралары улантылууда.