Жылдыз Шеримбекова Жогорку Кеңештин басма сөз кызматынын жетекчиси болуп дайындалды

Жылдыз Шеримбекова Жогорку Кеңештин аппаратынын басма сөз кызматынын жетекчиси болуп дайындалды. Бул тууралуу аталган мекемеден билдиришти.

Маалыматка ылайык, тиешелүү тескемеге Жогорку Кеңештин төрагасы Марлен Маматалиев кол койгон.

“Жылдыз Шеримбекова 2012-жылы Борис Ельцин атындагы Кыргыз-Орус Славян университетинин эл аралык мамилелер адистигин аяктаган. Эмгек жолун ошол эле жылы Чүй облусундагы Ысык-Ата райондук мамлекеттик администрациясында баштаган.

2015–2018-жылдары Кыргыз Республикасынын Өкмөтүнүн Чүй облусундагы ыйгарым укуктуу өкүлүнүн басма сөз катчысы болуп иштеген.
2018–2022-жылдары Кыргыз Республикасынын Борбордук шайлоо комиссиясында маалыматтык бөлүмдүн башчысы кызматын аркалаган.

Ошондой эле 2022–2024-жылдары Кыргыз Республикасынын Улуттук статистика комитетинин төрагасынын кеңешчиси болгон. Ал эми 2026-жылга чейин Кыргыз Республикасынын Президентинин администрациясынын Маалыматтык саясат кызматында эксперт болуп эмгектенип келген”, - деп жазылган маалыматта.