Бахрейндеги башкы аэропорттон бир саатта 20дан ашык учак учуп кетти

Бахрейндеги негизги эл аралык аэропорт жарым-жартылай ачылгандан кийин бир саат ичинде 20дан ашык жүргүнчү жана жүк ташуучу учак өлкөдөн учуп кетти. Бул тууралуу ТАСС басылмасына Жакынкы Чыгыштагы авиадиспетчердик тармактагы булак билдирген.

Анын айтымында, учуп кеткен учактардын көпчүлүгү Бахрейндеги улуттук авиакомпания - Gulf Air компаниясына таандык.

Маалыматка ылайык, Манама шаарынан учуп чыгууга мүмкүнчүлүк 28-февралдын экинчи жарымынан бери биринчи жолу ачылды. Ошол күнү өлкөнүн аба мейкиндиги АКШ менен Израиль тарабынан Иранга каршы башталган аскердик операциядан улам жабылган.

Буга чейин, 11-март күнү саат 04:00гө чейин (Бишкек убактысы менен 10:00) Бахрейндеги аба мейкиндиги дээрлик бардык учуулар үчүн жабык бойдон калаары айтылган. Учууга алдын ала макулдашылган айрым каттамдарга гана уруксат берилген.

Ошондой эле учактар үчүн коопсуздук максатында эң кыска аба коридору белгиленип, ал коңшу Сауд Арабиясынын аба мейкиндигине кирген жактагы текшерүү пунктка чейин жетет.