Өлкөдө тигүү тармагындагы кызматкерлер үчүн төлөмдөр төмөндөтүлдү (видео)

Кыргызстанда тигүү тармагы үчүн кызматкерлердин милдеттүү төлөмдөрү төмөндөтүлдү. Бул тууралуу Мамлекеттик салык кызматынын төрагасынын орун басары Кубанычбек Ысабеков "Биринчи радионун" түз эфиринде билдирип, тигүү тармагы үчүн каралган салыктык жеңилдиктер тууралуу айтып берди.

Анын айтымында, 2022-жылы бул тармак үчүн бирдиктүү салыктын 0,25 пайыз өлчөмүндөгү ставкасы киргизилгенин белгиледи. Бул өндүрүш тармагы үчүн эң төмөнкү ставка болуп эсептелет.

"0,25 пайыз - бул өндүрүш үчүн эң төмөнкү ставка. Башка өндүрүштөрдө, мисалы, накталай эсептешүүдө - 4 пайыз, накталай эмес эсептешүүдө - 2 пайыз. Ал эми бул жерде 0,25 пайыз, башкача айтканда, 10 эсе төмөн ставка",- деди ал.

Ошондой эле Ысабеков чакан бизнестин айрым өкүлдөрү үчүн патент менен иштөө мүмкүнчүлүгү калганын билдирди. Мисалы, чакан тигүү цехтери үчүн 10 тигүү машинасына 2 миң сом, дагы 10 машинага миң сом төлөнөт. Ошол эле учурда ар бир патент боюнча жүгүртүү 8 миллион сомдон ашпоого тийиш.

"Ал тармактагы негизги салыктык маселе бирдиктүү салыктын ставкасына эмес, кызматкерлер үчүн төлөнүүчү төлөмдөргө - киреше салыгы жана камсыздандыруу төгүмдөрүнө байланыштуу. Мурда бул сумма кызматкерлердин категориясына жараша 5,5 миң сомдон 9,5 миң сомго чейин жеткен. Бул өтө көп деген сунуш түшкөндөн кийин, биз бардык категорияларды бириктирип, төлөмдү 2,5 миң сомго чейин төмөндөттүк. Натыйжада төлөмдөр 3-4 эсе азайды. Андан кийин тармак өкүлдөрү ачык иштеп, кызматкерлерди расмий көрсөтүүгө даяр экенин билдиришти",- деди Кубанычбек Ысабеков.

Ал тигүү тармагы өлкө үчүн социалдык жактан маанилүү экенин баса белгиледи, анткени бул тармакта миңдеген адамдар иштейт. Ушуга байланыштуу мамлекет бизнестин мыйзамдуу жана туруктуу иштеши үчүн шарттарды түзүүгө кызыкдар.