Президент: "Кимдин курулуш компаниясы болсо, мамлекет жер берүүгө даяр" (видео)

Бүгүн, 11-марттагы Жогорку Кеңештин жыйынында президент Садыр Жапаров Мамлекеттик ипотекалык компания куруп жаткан үйлөр тууралуу суроолорго жооп берип жатып турак үйлөр өлкөнүн бардык аймактарына салынарын билдирди.

Анда өлкө башчы кимде курулуш компаниясы болсо, мамлекет жер берүүгө даяр экенин белгилеп өттү.

"Мурда Мамлекеттик ипотекалык компания банкка айланган эле компания болчу. Азыр башка шарттар менен үй алып жатышат. Буга чейин депутаттардын "жер бекер болуп жатса, эмнеге акча кошуп жатышат, өз баасында эле бербейби?" деген сындарын угуп калдым. Анткенге болбойт. Эгер үстүнө акча кошпосок, мамлекеттен төлөш керек болот. Албетте, жеке жактарга салыштырмалуу арзан.

Бул тармакта Каныбектин эле аты чыгат. "Туманбаев эле жыргап жатат, ошол эле салып жатат" деген. Кимде курулуш компаниясы болсо, мага келиңиздер, мен жер алып берем. Көрсөтүлгөн суммага бүтүрсөңүздөр, биз макулбуз. Мамлекеттик ипотекалык компанияны өзгөртүп жатканда бардык курулуш компанияларына кайрылгам. Баары шылдыңдап күлүп кеткен",- деди президент.