“Сочи-2014” Кышкы Олимпиадасына бара турган Дмитрий Трелевскийге 24 000 доллар стипендия берилген

Бүгүн, 24-январда “Сочи-2014” Кышкы Олимпиадасына карата Дене тарбия жана спорт мамлекеттик агенттигинин президенти Мурат Саралинов журналисттер менен жолугушуу өткөрүп, бир катар суроолорго жооп кайтарды.

“Сочи-2014” олимпиадасына барып келүү үчүн 175 000 сом каралган. “100 000 сом машыктыруучу менен спортчунун формасына сарпталды. Калган 75 000 сом экөөнүн барып-келчү каражаты. Орусияда жашоо, тамактанууга кетчү чыгымды Эл аралык Олимпиада комитети каржылайт” деди ал өз сөзүндө.

Жолугушуу учурунда ал “Сочи-2014” Олимпиадасына даярдык үчүн жана тандап алуу турларына катышуу үчүн аталган агенттик тарабынан 634 800 сом бөлүнгөнүн билдирди. Саралиновдун айтымында, бул спорт түрүнүн татаалдыгы жана анда колдонулуучу шаймандардын кымбаттыгы эске алынып, Дмитрий Трелевскийге жана бир тууган Алексей менен Павел Вакуриндерге (тилекке каршы, алар Кышкы Олимпиадага жолдомо ала алышкан жок) Улуттук олимпиада комитети тарабынан 24 000 доллардан стипендия берилген.