Атай Өмүрзаков 2 жылдык гастролго аттанат

Бийчи Атай Өмүрзаков жетектеп келген “Мен бийчимин” (“Я Танцор”) студиясы убактылуу жабылды. Бул тууралуу өзүн Атайдын жардамчысымын деп тааныштырган Айбек Мирбеков бүгүн, 24-январда SUPER.KG порталына билдирди.

Анын айтымында, студиянын жабылуусу Атай Өмүрзаковдун жана “Тумар КР” тобунун дүйнө жүзү боюнча гастролго аттанып жатканы менен байланыштуу. “Биз дүйнөнү кыдыруу үчүн жакынкы 2 ай ичинде учуп кетебиз. Учурда көптөгөн пландарды түзүп жатабыз. Биздин сапар 2 жылга созулат. Балким, Азия, Европа жана Американы кыдырып келген соң гана студияны кайрадан түзүүнү ойлонобуз. Азырынча ал тууралуу айтуу эрте”,- дейт ал.  

Эске салсак, “Мен бийчимин” студиясы өткөн жылдын март айында ишке кирип, студияга кабыл алынган бий сүйүүчүлөрүнүн саны 150гө чейин жеткен. Бийден тышкары ал жерде актёрдук чеберчилик, рэп боюнча сабактар өтүлгөн жана үн жаздыруу кызматы да болгон.