Ысык-Көл. Митингчилер Айбек Сарыбаевди жана башка кармалгандарды бошотуу үчүн бийликке 3 күн убакыт беришти

Ысык-Көл облусунун Жети-Өгүз районунун акими Дамир Моңолдоров эки тарапты тең канааттандыруучу конструктивдүү чечим кабыл алууга убада берди. Бул тууралуу аким 3-февралда журналисттерге маалымдады.

Митингчилер Айбек Сарыбаев менен “Кумтөрдүн” менеджеринен 3 миллион доллар талап кылган Эрмек Жунушбаев жана Бахтияр Курмановду бошотуу талабын айтышып, бийликке 3 күн убакыт беришти. Нааразылык акциясына чогулгандар Саруу айылына боз үй тигип жатышат. 

Эске салсак, "7-октябрда Караколдогу баш аламандыкты уюштурган" деп шектелип Айбек Сарыбаев баш болгон адамдар кармалган. Алардын бошотулуусун талап кылган жергиликтүү тургундар облустагы башкы унаа жолдорун бууп салышкан.