Ош. Мектептердеги жашы жете элек өспүрүмдөр арасындагы укук бузуулардын алдын алуу үчүн кеңешме өттү

Ош шаарында 4-февралда мектептердеги жашы жете элек өспүрүмдөр арасындагы укук бузуулардын алдын алуу, билим берүү мекемелериндеги тарбия иштеринин абалын жандандыруу максатында "Мектеп, ата-эне, коомчулук" аттуу кеңешме өттү. Социалдык өнөктөштүк долбоорунун алкагында өткөн иш-чара тууралуу Шаардык билим берүү башкармалыгынын жетекчиси Куштарбек Кимсанов билдирди.

“Биз кайсы бир көйгөйдү кимдир бирөөгө шылтап коюп эмес, биргеликте иш-аракет жасоо маданиятына жетишүүнү максат кылып жатабыз. Ошондо гана коомубузда укук бузууга жол берилбейт. Бүгүн мектеп окуучуларынын арасында кылмыштуулукту болтурбоо үчүн жыйналып отурабыз, мындай демилгеден жакшы натыйжалар жаралат деген үмүттөмүн”,- деди ал. 

Кеңешмеге мектеп директорлору, ата-энелер коомчулугу, массалык маалымат каражаттары, Ички иштер башкармалыгынын жана аймактык кеңештин өкүлдөрү катышып, өспүрүмдөр арасындагы укук бузуулардын алдын алуу максатындагы көйгөйлүү маселелер талкууга алынды.