Жылдыздар Шри-Ланкадан кайтып келишти

Гезит менен көп жылдан бери кызматташып келе жаткан ырчы Каныкей, рэпер Добр, алып баруучу Нурзат Токтосунова, “Тамашоу” долбоорунун түзүүчүсү, алып баруучу Эрмек Нурбаев жана “Супер сулуу-2013” сынагынын жеңүүчүсү Орункүл Шабралиева 30-январь күнү “Супер-Инфо” гезитинин жолдомосунун негизинде Инд океанындагы Цейлон (азыркы Шри-Ланка) аралына эс алууга жөнөшкөн.  

Инд океанынын жээгиндеги эс алуу жыйынтыкталып, жылдыздардан түзүлгөн топ кайтып келди.

Алардын кубанычына, аптыга сүйлөп, сезимдери менен бөлүшүп жаткандарына карап эс алуунун жакшы болгонун болжолдоого болот. Алардын сезимдерин, кандай эс алып кайтышканын өз ооздорунан угууну чечтик.

Ырчы Каныкей ысык өлкөдөн келгенден кийин Кыргызстан өтө суук сезилгенин айтат: “Бул жак аябай суук экен. Келгенде эле үшүп кеттим. Шри-Ланкада кайталангыс эс алуу болду. Бизге жакшы стимул жаралды. Көп кызыктарга кез келдик. Тамактары жанга жагарлык экен. Гезитке ыраазычылык билдирем”.

Биринчи жолу эс алуу үчүн алыс жакка чыгып келген рэп ырчысы Добр бул эс алууну унутпай турганын билдирди. “Эс алуу ойдогудай болду. Биздин курам жакты. Баргандан тарта бир дагы мүнөтүбүздү текке кетирбей жакшы эс алдык. Бул эс алуу көпкө чейин эсимде калат деп ойлойм”,- деп сүйүнүчүн жашырган жок.

Эрмек Нурбаев Бишкек мененШри-Ланкадагы абанын температурасынын айырмасы 50 градус экенин белгилеп өттү: “Эс алууга жакшы барып келдик. Ал жакта +30 градус ысык экен. Бишкекте болсо -20 градус суук болуп жатыптыр. Ортодогу айырма 50 градус. Ойдогудай эс алдык. “Супер-Инфо” гезитине дагы бир жолу ыраазычылык билдирем”.

Эс алуу Нурзат Токтосуновага жаңы күч, жаңыдем тартуулаганын кубануу менен айтып берди. “Мен аябай кубанып жатам. Тим эле жыргап келдик. Жаңы күч, жаңы дем берген эс алуу болду. Ойлорду топтоп туруп, башкача жашай турган мезгил келди деп ойлойм",- деп жашоосуна жомоктогудай күндөрдү тартуулаганы үчүн “Супер-Инфого” терең ыраазычылык билдирерин кошумчалады.

Инд океанынан катуу таасирленген Орункүл Шабралиева да кубанычы менен тең бөлүштү: “Сонун эс алып келдик. Ысык жайдан суук жерге түшүп калганга көнүү кыйыныраак болуп жатат. Инд океаны чоң болгонуна карабай аябай жылуу экен. Ал жак көп таасир калтырды. Оюн ойноп, көңүлдүү жүрдүк. Абдан жакшы эс алып келдик”.

Жылдыздардын эс алуусу тууралуу даярдалган макаланы, фоторепортажды "Супер-Инфо" гезитинин 14-февраль, жума күнү чыга турган санынан окуп, эс алуудан видеорепортажды SUPER.KG порталынан көрө аласыздар.