Норвегияда студенттер арасындагы жарманкеде Кыргызстан 1-орунду багынтты

Норвегиянын Телемарк "Telemark University College" (TUC) университетинин алдында 8-февраль күнү студенттер арасында жарманке болуп өттү. Анда 20дан ашуун мамлекеттин студенттери өз өлкөсүнүн маданиятын тартуулап, улуттук буюмдарын жана тамак-аштарын көргөзмөгө коюшкан. Көргөзмөгө экинчи ирет катышкан кыргызстандык студенттер бул жолу 1-орунду багындырышты. 

Бул тууралуу SUPER.KG порталына жаш активист Дулат Атучиев билдирди. Анын айтымында, аталган иш-чаранын негизги максаты - ар бир мамлекеттин каада-салтын өз ара тааныштыруу. Бул жарманкеге катышуу үчүн чет өлкөдөгү университеттердин студенттери эл аралык программа менен келишип, 1 семестр окуусун улантуу учурунда катыша алышат. 

“Биздин мекендештер "Эразмус Мунтус" (кызматташуу)  программасы аркылуу 1 семестр окуусун улантуу учурунда катышышты. Кыргызстандагы айрым жогорку окуу жайлар Телемарк (TUC) университети менен тыгыз байланышта. Негизинен биздин өлкөнүн студенттерине 5 окуу оруну бөлүнүп берилет. 

Жарманкеге катышкан Бишкек финансы жана экономика академиясы, Кыргыз экономика университети, Кыргыз-Түрк "Манас" университети жана Ысык-Көл университеттеринин студенттерине аталган окуу жайлар жардам берди. 20дан ашуун өлкөнүн ичинен 3-орунга Монголия, 2-орунга Грузия татыктуу болду. Ал эми 1-орунду Кыргызстан багындырды”,- деди активист.