Баткен облусунда студенттерден куралган кылмыштуу топ кармалды

Баткен облусунда студенттерден куралган кылмыштуу топ кармалды. Алар Ош технологиялык университетинин студенттери болушкан. Бул тууралуу Баткен ОИИБинин басма сөз кызматы билдирди.

Маалыматка караганда, кармалгандар январь-февраль айларында болгон бир катар кылмыштарга шектелип жатышат.

- Январь айында Кадамжай шаарындагы Шаршара аймагындагы жүк сактоочу кампадан баасы 19 миң долларлык шоколаддар уурдалган;

- 12-январдан 13-январга караган түнү Кадамжай районунун Халмион айылынын тургуну Диярбек Рустамовдун үйүнүн жанында жайгашкан контейнеринен 12 500 сомдук момпосуй жана ошол эле түнү Халмион айылынын тургуну Улукбектин үйүнөн 90 миң сомдук кездеме уурдалган.

- 4-февралдан 5-февралга караган түнү Кадамжай районунун Халмион айылындагы №11-үйдүн кампасынан жалпы суммасы 100 миң сомдук 10 даана сыналгы уурдалган.

Учурда жогорудагы уурулук фактыларына шектелип Кадамжай районунун Кызыл-Булак айылынын 21 жаштагы тургуну Т.Б., Кара-Суу районунун Савай айылынын 19 жаштагы тургундары П.М. жана К.Т., Кызыл-Кыя шаарынын 20 жаштагы тургуну М.А. кармалды. Алар уурулуктан түшкөн акча каражаттарына эки даана Хонда Фит унаасын сатып алышкан.

Бул фактылар боюнча тергөө амалдары жүрүп жатат.