Ош. Алай районунда Мекенди коргоочулар күнүнө карата майрамдык салтанат болуп өттү (фоторепортаж)

Бүгүн, 22-февралда Алай райондук Маданият үйүндө аскер кызматкерлери тарабынан Мекенди коргоочулардын жана Эл аралык эне тил күндөрүнө карата майрамдык салтанат болуп өттү.

Анда 92843-аскер бөлүгүндө кызмат кылган айымдардан түзүлгөн «Мырзайым», «Беш жылдыз», «Ала-Тоо айымдары» курама командаларынын сынагы орун алды.

Сынакта командаларга эне тилди даңазалоо жана мекенди коргоо боюнча тапшырмалар берилип, өз  өнөрлөрүн көрсөтүштү. 1-орунду багындырган "Мырзайым" тобуна 1500 сом тапшырылды. 2-орунду ээлген "Беш жылдыз"  тобуна 1000 сом жана 3-орунду камсыз кылган "Ала-Тоо айымдары" тобуна 500 сом өлчөмүндө акчалай сыйлыктар берилди. 

23-Февраль - Мекенди коргоочулардын күнүнө карата кызматтык милдеттерин аткаруудагы артыкчылыктары үчүн Убайдулла уулу Тынарбек жана Тайлакова Жумагүл Алай райондук мамлекеттик администрациясынын Ардак грамоталары менен сыйланышты.