Нигерияда радикал экстремисттер Федералдык колледжди 30 адам менен кошо өрттөп салышты

25-февралда “Боко Харам” ислам радикал уюмунун мүчөлөрү Федералдык колледжди 30 адам менен кошо өрттөп салышты. Бул тууралуу чет элдик басылмалар жазып чыгышты. 

Маалыматка ылайык, согушчандар чабуул жасап, имаратка өрт коюшкан. “Боко Харам” (“Батыштын билими – күнөө” деп которулат) уюму акыркы убактарда билим берүү жайларына бир нече жолу кол салышкан.

Өткөн жылдын октябрь айында Эл аралык "Amnesty International" уюму Түндүк Нигерияда радикал экстремисттик уюмдардын өкүлдөрү мугалимдер менен окуучуларга атайын кол салып жаткандыгын билдиришкен. Жүздөгөн окуучуларды өлтүрүп келген радикалдардын кадамдары барган сайын мыкаачылыкка өтүп жаткандыгы айтылган. Мектептерден сырткары радикалдардын Айыл чарба колледжинде 50 студенттин өлүмүнө себепкер болушканы маалымдалат.