Ош. Обончу жана аткаруучу Түмөнбай Колдошовдун “Мен дүйнөнү апам менен тааныгам” аттуу жеке концерти болуп өттү

Кечээ, 27-февралда Ош улуттук драма театрында обончу жана аткаруучу Түмөнбай Колдошовдун жеке концерти өттү. Концерт обончунун бала чагы чагылдырылган чакан спектакль менен башталды. Алып баруучулук тизгинди жаш акын Улукбек Омокеев колуна алды. Түмөнбай Колдошовдун концерти “Мен дүйнөнү апам менен тааныгам” деген аталган экен. Алып баруучу концерттин мазмунуна токтолуп: “Апа, ушул сөздү уккан сайын тээ бала кезим, анан студенттик күндөрүм эске түшөт. Окууну аяктап, Ош шаарында студент болдум. 1-курсумда сени сагынып, тынбай кат жазып турдум, а сен курут-майыңды, тандырга жапкан ак наныңды жөнөтүп турдуң. 3-курста катты сейрек жазып калдым, а сен тынбай курут-майыңды, ак наныңды жөнөтүп турдуң. 5-курс болдум, таптакыр кат жазбай калдым. А сен анда да тынбай курут-майыңды, ак наныңды жөнөтүп турдуң. Мына, үй-бүлө күттүм, өз алдымча болдум, а сен дагы деле курут-майыңды, ак наныңды жөнөтүп жатасың”,- деди. Жүрөктөн чыккан сөздөр көрүүчүлөрдүн көзүнө жаш тегеретти.

Ырчы “Ошту неге сен сагынбай жүрөсүң?”, “Аяп сүйгөм”, “Сенсиз күнгө көнөрмүн”, “Узун жолдор”, “Сиз жөнүндө ырлар жазбайм эми мен”, “Мен дүйнөнү апам менен тааныгам” аттуу чыгармаларын аткарды.