Ош. "Мейманкананын администраторун мыкаачылык менен өлтүрдү” деп шектелип 59 жаштагы адам кармалды

“Оштогу мейманканалардын биринин администраторун мыкаачылык менен өлтүрдү” деп шектелип 59 жаштагы адам кармалды. Бул тууралуу Ош шаары жана Ош облусу боюнча Ички иштер башкармалыгынын басма сөз кызматы бүгүн, 7-мартта билдирди.

Маалыматка караганда, 6-март күнү эртең менен Ош шаарындагы “Ак-Тилек” мейманканасынан Өзгөн районунун 48 жаштагы тургуну С.Топчубаеванын жансыз денеси табылган. Тергөөнүн жүрүшүндө анын денесине 10 жолу бычак сайылганы белгилүү болгон. Ошондой эле жансыз дененин жанынан кат табылган. Анда “ал ошого татыктуу болчу” деп жазылган.

Окуядан көп өтпөй бул кылмышка шектелип 1955-жылы туулган И.Жумабаев колго түшүрүлгөн. Учурда “адам өлтүрүү” беренеси боюнча кылмыш иши козголуп, тергөө амалдары жүрүп жатат.

Алдын ала маалыматтарга караганда, кылмышка шектүүнүн мындай ишке барышына кек сактоо себеп болгон.