Якутияда 9 жаштагы кыз жолбун иттерге таланып каза тапты

Якутиянын Тикси шаарчасында жүрөктүн үшүн алган окуя катталды. 9 жаштагы кыз көчөдө жолбун иттерге таланып, алган жаракаттарынан улам окуя болгон жерде каза тапты. Бул тууралуу 11-мартта Якутиянын Президенттик администрациясы жана өкмөтү билдирүү тараткандыгын айтып орусиялык маалымат каражаттары жазып чыгышты. 

Маалыматка ылайык, бүгүн эртең менен Якутиянын вице-премьер-министри Павел Маринычев каза тапкан кыздын үй-бүлөсү жана жергиликтүү тургундар менен жолугушуп, шаарчанын жетекчилерине жолбун иттерге каршы чараларды көрүү тууралуу тапшырмаларды берди. Ал эми ата-энелерге балдарын кароосуз калтырбоо жана мектепке узатып, алып барып келүү сунуштары айтылды. Ошондой эле каза тапкан кыздын үй-бүлөсүнө психологиялык, материалдык жардам берүү тууралуу тапшырма берген. 

Учурда шаарчада полиция, администрация кызматкерлеринен жана эл арасынан өз ыктыяры менен чыккан мырзалардан атайын кошуундар түзүлүп, күзөткө чыгышууда.

Эске салсак, үстүбүздөгү жылдын 18-февралында Якутиянын Беркатит шаарчасында да 9 жаштагы бала жолбун иттерге таланып каза тапкан.