Ош. "Бөтөлкөлөш айымды мууздап салган" деп шектелип 22 жаштагы жаран кармалды

Ошто "бөтөлкөлөш айымды мууздап салган" деп шектелип 22 жаштагы жаран кармалды. Бул тууралуу 17-мартта Ош ОИИББинин басма сөз катчысы Замирбек Сыдыков билдирди. 

Маалымаька ылайык, 16-мартта саат 04:30 чамасында №16-кесиптик лицейине тиешелүү жатаканада 1987-жылы туулган айымдын жансыз денеси табылган. Маркумдун Ош шаарына караштуу Жапалак аймагында туулган Ч.Элмира экени аныкталган. Анын денеси табылган бөлмө канга боёлуп, маркумдун моюну кесилгени белгилүү болгон. Ошондой эле кылмыш болгон жерде арактын сынган бөтөлкөсү табылган. 

Ош шаардык ички иштер башкы башкармалыгы тарабынан кылмышка шектүү деп 22 жаштагы А.А. кармалды. Анын буга чейин соттолгону белгилүү болуп, убактылуу кармоочу жайга жеткирилди. Ага карата КРнын Кылмыш-жаза кодексинин “адам өлтүрүү” беренеси боюнча кылмыш иши козголду. 

Колго түшүрүлгөн жаран кылмышты моюнуна алган. Алдын ала маалыматтарга караганда, кылмышка шектүү менен маркум арак ичип отурушкан. Чатак чыгып, мушташа кеткенде А.А. бөтөлкөнү сындырып, Ч.Элмираны мууздап салган. Кылмыштан кийин шаардан чыгып кетүүгө аракет кылып, бирок жетишкен эмес. Азыркы тапта бул факты боюнча иликтөө иштери жүрүүдө.